LAOAG CITY – Kinumpirmaran ni Brgy. Chairman Edward Antalan ti Brgy. 14, Tartarabang iti ili ti Pinili nga adda ti lima a primary contacts dagiti agasawa a nagpositibo iti COVID-19 iti ciudad ti Batac iti Barangay da nga isuda IN-C1040, lalaki, agtawen ti 35 ken IN-C1044, babai, agtawen ti 35 a residente dagitoy ti Brgy. 4, Nalupta iti nasao a ciudad ken agpada dagitoy a health care worker.
Segun kenni Antalan, daytoy ket kalpasan a napan bimmisita dagiti agasawa iti pamilya ti babai iti Sitio Mangga Norte iti Barangay da idi Marso 27 iti agdama a tawen tapno agpasiar banag a nakadawyanen nga ar-aramiden dagiti agasawa tunggal weekends.
Inlawlawag na a saan pay a dimmalan ti swab test dagiti agasawa idi bimmisita da iti pagtaengan ti pamilia ti babai.
Inbatad na a naammoan laeng a nagpositibo iti COVID-19 ti lalaki kalpasan a nakarikna daytoy ti sakit iti bagbagi rason a napan nagpa-check up ket ditoy metten a dimmalan iti swab test pakairamanan ti asawa na no sadino a positibo met dagitoy iti nasao a virus.
Mainaig iti daytoy, segun ken ni Brgy. Chairman Jose Quimoyog ti Brgy. 4, Nalupta iti ciudad ti Batac na nabayagen a saan nga agnanaed iti Barangay da dagiti agasawa gapo ta agkaskasera dagitoy iti Brgy. 7, Caunayan iti nasao met laeng a ciudad iti sumagmamanon a tawen.
Nupay kasta, kunana nga adda aldaw a napan bimmisita dagiti agasawa iti pamilya ti lalaki rason a nagbalin a primary contacts dagiti dua a miembro iti pagtaengan ngem saancna pay a masinunuo no kaano a dumalan ti swab test dagiti dua a miembro ti pamilia ti lalaki iti Brgy. Nalupta gapu ta awan pay ti mandar a naawat na manipod iti City Health Office.
Inbaga na a dagiti agasawa ket agpada a nurse no sadinno ti lalaki ket agpapaay iti City Health Office idinto a ti babai ket agtrabtrabaho iti Mariano Marcos Memorial Hospital and Medical Center.
Innayon ti Kapitan nga iti agdama ket naka-quarantine dagiti agasawa iti Quarantine Facility iti ciudad ti Batac.
