LAOAG CITY – Lima nga indibidual dagiti nasugsugatan kalpasan a nagbaliktad ti maysa a kotse bayat a dumaldalyasat iti national highway a paset ti Brgy. Parado iti ili ti Dingras.
Inbatad ni Pol. Maj. Julius Basallo, ti hepe iti PNP-Dingras a basar iti panagimbestigarda, agpaabagatan ti maysa a Toyota Corolla a kotse nga inturong ni Christopher Pascua y Guillermo, agtawen ti 43, naasawaan ken residente iti Brgy. San Francisco iti nasao nga ili.
Nu pay kasta, kellaat a naawanan daytoy ti control iti manibela rason a naidungpar kadagiti kayo iti igid ti kalsada.
Gapu iti kapigsa ti impact ket nagbaliktad ken simmalpot ti kotse iti sango ti pagtaengan ni Novelyn dela Cruz nu sadino nga adda ti nakaparking a tricycle.
Kabayatanna, adda iti asideg ti tricycle ti anak ni Novelyn ken isu ti natamaan kadagiti natukkol a sanga ti kayo rason a natupakan nasugsugatan ti tumeng ken likod daytoy.
Mainaig iti daytoy, nagsagaba met ti sugat iti nagduduma a paset ti bagi ti nangiturong ti kotse pakairamanan dagiti tallo a pasahero na.
Agpapada a naitaray dagitoy iti Dingras District Hospital para iti naan-anay a pannakataming da.
