LAOAG CITY – Tiniliw dagiti kameng ti Philippine National Police (PNP) iti ili ti Pinili dagiti lima nga indibidual a nakalugan iti maysa nga elf truck a nagkarga ti kamatis a maideliver koma iti ciudad ti Batac ken ditoy ciudad ti Laoag.
Karaman a natiliw ket ti driver ti elf truck a ni Michael Sanchez, agtawen ti 28, baro taga Nueva Ecija ken dagiti lima nga helper na nga agpapada taga Zone 2-A, Barangay Malasig Nueva Ecija.
Segun ken ni Police Lt. Reymar Almazan, ti chief of police iti ili ti Pinili, kabayatan ti panagsardeng ti elf truck iti Triage Control a pakainspeksyunan dagiti sumrek ditoy probinsya ket ditoy nga inpakita da pay ti medical documents da.
Nupay kasta, kuna ni Almazan a naduktalan da a ti iggem dagiti suspek a travel order ket daanen ken saan nga inisyu ti San Jose City PNP iti Nueva Ecija a naggapoan dagiti maseknan.
Gapu iti daytoy, tiniliw da dagiti suspek ken pilaan da dagitoy iti reklamo a panaglabsing iti Republic Act (RA) 170 wenno palsification of documents.
Iti agdama, nagtalinaed dagiti suspek iti PNP Currimao gapu ta awan ti kustodial facility iti PNP-Pinili.
