LAOAG CITY – Naisyuan ti citation ticket ti lima nga indibidual gapu iti panagusarda iti naringgor a tambutso iti ili ti Badoc.
Daytoy ti inbatad ni P/Cpt. Elison Pasamonte, ti chief of Police ti Philippine National Police iti nasao nga ili.
Segun kenkuana, kabayatan ti mandatory check point ket ditoy a nakumpiskar dagiti lima nga open pipe wenno nariringor a tambutso manipud kadagiti lima nga indibidual a residente met laeng iti ili ti Badoc.
Inpakaammu ni Pasamonte a naiget a maipawil ti panagusar iti open pipe wenno nariringgor a tambutso nangruna kadagiti national roads gapu ta daytoy ket mangitunda iti riribuk.
Kunana a ti siasinnoman a matiliw ket maisyuan ti ticket ken mamulta.
Maipalagip nga iti ili ti Badoc ket addaan ti ordinansa a maiparit ti panagusar ti modified muffler.
