LAOAG CITY – Lima a tattao dagiti nasugsugatan kalpasan a nagdidinungpar ti tallo a behikulo iti paset ti Brgy. 13- Naglicuan iti ili ti Pasuquin.
Inbatad ni PMaj. Julius Basallo, hepe ti PNP iti nasao nga ili a basar iti inisyal nga imbestigasyon ket agturong iti aminana ti motorsiklo nga inmaneho ti maysa a residente iti Brgy. 29 Pasuquin ken ginandat na ti nang-overtake iti van a sarunuen na.
Nu pay kasta, saan a napuotan ti driver ti motorsiklo nga adda ti kasabat na kurong-kurong nga inturong met ti agtawen ti 35, mangngalap karaman dagiti pasahero na nga agtawen ti 10, 50, 11 ken agpapada dagitoy a residente iti Brgy. 37-A Casilian iti ili ti Bacarra.
Gapu iti daytoy, nagdidinnungpar dagiti tallo a behikulo ken isu ti nangitunda iti pannakasugsugat dagiti naglugan iti kurong-kurong.
Dagus a naitaray dagiti biktima iti Governor Roque Ablan Senior Memorial Hospital ditoy siudad ti Laoag para iti naan-anay a pannakataming da.
Agpapan a maisursurat ti damag ket saan pay a masinunuo dagiti otoridad nu naggapoan dagiti nasao a behikulo ken nu adda iti impluwensya ti nasanger dagiti nangiturong kadagitoy.
Kabayatanna, agtultuloy ti pannakaisayangkat ti naun-uneg nga imbestigasyon iti nasao nga insidente.
