LAOAG CITY – Nagballigi ti nagtipon a pwersa ti PNP-CIDG ken PNP-Paoay a nangtiliw kadagiti lima manipud iti innem nga indibidual nga illegal a nagsusugal iti minatayan iti Brgy. 9, San Pedro iti ili ti Paoay.
Daytoy ti inbatad ni Police Major Romnick Subia, ti mangidadaulo iti PNP-CIDG ditoy probinsya.
Segun kenkuana, nakaawat da ti report mainaig iti maipagarop a panagsusugal dagiti suspek iti nasao a lugar.
Inbatad na nga iti panagresponde da ket naaktwan da dagiti suspek nga agay-ayam ti “lucky 9”.
Ginandat dagiti suspek ti aglibas apaman a nakita da dagiti otoridad ngem saandan a nakaliklik malaksid iti maysa a nakalibas.
Nakumpiskar dagiti otoridad iti lugar ti maysa a set ti baraha, maysa nga ules nga agmaris ti puraw, maysa a lamisaan, uppat a mono block chair ken ti ₱4,775 a pisos a maipagarop a pusta dagiti maseknan.
Iti agdama, nagtalinaed dagiti suspek iti kustodyar ti PNP-CIDG ken maisagsaganan ti reklamo a panagsusugal a maipila kontra kadakuada, pakairamanan ti nakalibas a kadwa da.
