LAOAG CITY – Lima nga indibidual ti natiliw iti border checkpoint iti ili ti Badoc gapu iti panagusar da ti peke nga antigen result.
Daytoy ti kinumpirmaran ni PCapt. Joseph Tayaban, hepe ti PNP-Badoc.
Inpakaamo ni Tayaban a dagiti natiliw ket naggapo iti Abra, Tarlac, Bulacan ken Misamis Oriental ken dagitoy ket mapan koma agideliver ti alcohol iti dakkel a mall iti ili ti San Nicolas ken dagiti daduma ket agideliver met ti contruction supplies iti ili ti Currimao.
Inlawlawag na a ti inpresentar dagiti maseknan nga antigen test result ket naduktalan a peke dagiti otoridad gapu ta awan ti dry seal na,stamp mark ken ti pirma ket scanned.
Innayun na nga awan pay ti rimuar a nagan dagiti lima iti listaan dagiti dimmalan iti antigen test.
Gapu iti daytoy, sumango iti kaso a panagsalungasing iti Art. 174 iti Revised Penal Code dagitoy ken ti Sec. 27 RA10591 wenno ti Falsification by private individuals and Used of Falsified Documents.
Innayun na nga iti bolan ti Nobiembre ket 21 ti pakabuklan dagiti natiliw gapu iti panagusar ti peke nga antigen result.
