LAOAG CITY – Balligi a naarestar dagiti lima nga indibidual iti naiyuswat nga anti-illegal gambling operation iti Brgy. Poblacion 2 iti ili ti Pasuquin.
Segun ken ni PMaj Nelson Apostol, ti mangidadaulo ti CIDG ditoy probinsya, uppat dagiti natiliw a lalaki idinto a maysa ti babai ken agpapada dagitoy nga adda iti umno a tawen ken residente iti nasao a barangay.
Kuna na a naiyuswat ti operasyon kalpasan a nakaawat da ti impormasyon seknan kadagiti agsusugal.
Inbatad na a naaktuan nga agay-ayam dagiti maseknan ti mahjong.
Nakumpiskar manipod kadagit suspek ti gambling paraphernalia, lamisaan ken 2,220 a pisos a pusta.
Iti agdama ket nagtalinaed dagiti lima a suspek iti kustodyar ti CIDG bayat a maisagsagan ti kaso a panaglabsing ti PD1602 wenno ti illegal gambling law kontra kadagitoy.
