LAOAG CITY – Pimmusay amin dagiti lima a nakalugan iti tricycle kalpasan a dinungpar ti kotse iti Barangay 7 Sucsuquen iti ili ti Piddig.
Daytoy ti kinumpirmaran ni Police Lt. Rudy James Jacalne, ti chief of police ti PNP-Piddig.
Binigbig ni Jacalne ti pimmusay a driver ti tricycle a ni Edward Rumbaoa Burgos, agtawen ti 41, dagiti katugangan na a lakay ken baket ken dua a menor de edad nga agatawen ti 17 ken pito, idinto a ti driver ti kotse ket ni Jonathan Pacaro, agtawen ti 28 ken residente iti ili ti Vintar.
Iti imbestigasyon, kuna ni Jacalne a dagiti biktima ket naggapo da iti Barangay Calambeg tapno makiminatay ken idi agawid dan ken adda da iti Baranay Sucsuquen ket dinungpar ti kotse.
Naamoan nga immovertake ti kotse iti innova ken napaspas ti panagpataray ti driver ken nasabat na ti tricycle a rason metten ti desgrasya.
Inbatad ni Jacalne nga idi nadungpar ti kotse ti tricycle ket naregreg ti driver ngem inderetso pay laeng ti suspek a dinungpar daytoy agingga a naarado iti kaadayo a 60 a metro rason a naipurwak dagiti biktima.
Dagus a pimmusay ti driver ken ti dua a katugangan na idinto a dagiti dua nga ubbing ket naideklara a dead on arrival.
Kinumpirmaran pay ti hepe a basar iti nagreport kadakuada ket intarayan ti driver ti kotse dagiti biktima, ngem simmuko met laeng kadagiti pulis a nagresponde.
Mainaig iti daytoy, kunana a basar iti panagimbestigar da ket maipagarop a nagmalmalem a naginom ti suspek ken idi rabii ket arig na nagroad-trip nga immay ditoy ciudad ti Laoag ken agawid metten iti ili ti Vintar idi napasamak ti desgrasya.
Kabayatanna, sumango ti driver ti kotse iti kaso a reckless imprudence resulting to multiple homicide and damage to property ken panaglabsing iti Republic Act 10586 wenno ti Drivng Act of 2013.
