LAOAG CITY – Lima nga indibidual ti natay a pakairamanan ti uppat a bolan na paylaeng a maladaga kalpasan a dimmalapos ti dinosdosenan a napipigsa nga alipugpog idiay Estados Unidos.
Basar iti report, rinibo a residente ti napukawan ti suplay iti kuryente kalpasan kadagiti insidente a nangrugi paylaeng idi biernes.
Naamoan nga uppat kadagiti natay ket manipod iti Oklahoma no sadinno a naideklarar iti estado ti State of Emergency.
Naggapo met iti Iowa ti maikalima a pimmusay gapu kadagiti sinagaba na a nakana a sugat.
Inpakaammo ti Oklahoma State Department of Health nga umabot iti 100 a sabsabali dagiti nagsagaba ti sugat gapu kadagiti insidente.
