LAOAG CITY – Nabirukanen ti City Social Welfare Development Office (CSWDO) ditoy ciudad ti Laoag dagiti lima a katulong ni dati a Mayor Chevylle Fariñas a maipagarop a saan a maswelsweldoan.
Segun kenni Mrs. Perlita Cabello, mangidadaulo iti CSWDO, dua nga aldawen nga awan dagiti katulong iti balay ti pamilya Fariñas ken naala da dagitoy iti ili ti Pagudpud.
Inlawlawag na a napan da iti pagtaengan ti driver a ni Mr. Amador Ancheta nga isu ti inbatad ni Hon. Mikee Fariñas iti Barangay 3 ditoy ciudad ken ti nakaikamangan na iti Barangay Navotas ngem saan da a nabirukan.
Nupay kasta, nakisarita da iti PNP-Laoag nga isu ti mangimbitar kenni Ancheta ken naamoan ni Cabello nga adda iti Barangay Baduang iti ili ti Pagudpud dagiti maseknan.
Ummuna iti daytoy, naamoan ni Cabello manipud kenni Ancheta nga iti boundary ti Laoag-Bacarra ummuna nga ayan dagitoy ngem nakadanon da iti ili ti Pagudpud.
Inbatad na a dagiti lima a katulong ket saan da nga agga-ammo ken naduktalan da laeng a maymaysa ti nang-recruit kadakuada idi adda dan ditoy ciudad ti Laoag.
Naibaga pay kadagiti maseknan a lima a ribo a pisos ti sweldo dagitoy iti makabulan.
Naamoan a dagiti nagserbi a katulong ti pamilya Fariñas ket addan uppat ken pito a bulan a saan a nasweldoan ken idi laeng kalman a naited ti sweldo dagitoy.
Iti agdama ket adda iti kustudiyar ti CSWDO dagiti lima a nagserbi a katulong ti dati a mayor ken ur-urayen da dagiti nagannak dagiti maseknan.
