LAOAG CITY – Nasugatan dagiti lima nga indibidwal kalpasan ti napasamak a desgrasya iti national highway iti Barangay 55 Barit ditoy ciudad ti Laoag.
Nabigbig ti nangiturong ti motorsiklo a ni John Rey Galiza y Garay, agtawen ti 33, naasawaan, mangisursuro ti Parang Elementary School iti Barangay Duripes iti ili ti Bacarra ken residente iti Barangay Teppang iti nasao nga ili, idinto a ti tricycle driver ket ni Joseph Molina Gandeza, agtawen ti 47, naasawaan, maysa a tricycle driver ken residente iti Barangay 23 ditoy ciudad.
Naamoan a ni Gandeza ket addaan ti tallo a pasaheros nga agpapada nga estudyante a da Sheena Grace Castillo y Reyes, 19, aga Tanauan, Batangas; Luz Andrea Pria Candare, 19, taga Genral Trias, Cavite ken ni Angel Gabriel Cadalin y Puso, 19 taga San Mateo, Rizal.
Ti imbestigasyon ti PNP-Laoag, bayat nga agpapaamyanan dagiti dua a behikulo ket kellaat a nadungpar ti ni Galiza ti likudan a paset ti tricycle ni Gandeza rason ti desgrasya.
Gapo iti daytoy, nagsagaba ti sugat iti nagduduma a paset ti bagi dagiti biktima ken naitaray dagiti dua a driver iti Governor Roque Ablab Senior Memorial Hospital ditoy ciudad idinto a dagiti tallo a pasaheros ket naikabil ti Ranada Hospital.
Naamoan nga inadmitir met ni Galiza a nakainom ti nasanger bayat ti panangiturong na ti motorsiklo na.
