LAOAG CITY – Mangrugin intono Lunes, Pebrero 7 ti limitado a face to face classes kadagiti amin a program iti Mariano Marcos State University (MMSU).
Segun kenni Dr. Prima Fe Franco, Vice President for Academic Affairs iti MMSU, ummuna a naawat da ti CHED certification para iti pannakaiyuswat ti face to face classes iti College of Medicine, Nursing ken Physical Therapy.
Simmaruno met ti College of Engineering ken kadagiti aminen a program iti nadakamat nga unibersidad.
Inbatad na nga adda ti checklist ken nakumpleto ti unibersidad daytoy agingga a nangala da ti permit manipud iti opisina ni Gov. Matthew Marcos Manotoc ken nangaramid ti Affidavit of Undertaking ni MMSU President, Dr. Shirley Agrupis para iti daytoy a face to face classes.
Naamoan a ti 30 a porsiento a kapasidad laeng ti mapalubusan para iti maysa a laboratory classroom, ken masapol a fully vaccinated dagiti makipartispar kas iti estudyante, professor ken school staff.
Basar iti datos, umaboten iti 99.6% kadagiti MMSU Faculty and Staff ti nabakunaan kontra iti covid-19 idinto a kadagiti estudyante ket 97%.
Para met kadagiti estudyante a saan a mabalin nga agbakuna gapo iti medical reason ket makipartisipar babaen iti online class.
Karaman met kadagiti pagalagadan a maipatungpal ket ti kaada ti agbantay a guard ken health and wellness group ken dagitoy ti mangkita ti temperature dagiti sumrek.
Masapol met nga ipakita dagiti estudyante ti health declaration, vaccination card, Philhealth enrollment, waiver manipud iti nagannak ken doktor.
Iti met uneg a mismo ti classroom ket adda ti masurot a sitting arrangement ken maminsan da laeng a mabalin a sumrek ken rumuar iti unibersidad.
Kasta pay nga adda dagiti directional arrows ken masapol nga iti akin-kannawan latta a paset ti corridor ti pagdalanan dagitoy, ken mangitugot da ti bukod da nga hygiene kits.
Para met kadagiti suspected covid cases wenno adaan ti sintomas kas iti gurigor, panateng, uyek ken dadduma pay ket adda ti University Isolation a pakaipanan dagitoy.
Binalakadan met ni Franco dagiti estudyante a no saan a nasayaat ti marikrikna da ket saan dan a sumrek iti unibersidad ken agtalinaed da iti bukod da a pagtaengan.
Mainaig iti daytoy, kuna ni Franco a basar iti survey da ket adda ti 860 nga estudyante ti aggapo iti sabali a probinsya ken 10 a porisento kadagitoy ti saan pay a nakastrek ditoy Ilocos Norte.
Gapo iti daytoy, inbatad na nga inkoordinar da daytoy iti gobernador para iti panagserrek dagiti estudyante ditoy probinsya intono Lunes.
Dinakamat na nga ammo metten dagiti border personnel nga adda dagiti estudyante a sumrek para iti face to face classes ken adda met ti certification dagitoy manipud iti unibersidad.
