LAOAG CITY – Nagballigi ti nagtitipon a pwersa ti PNP-Laoag, PDEU, INPPO, PDEA ken NPO iti inyuswat da a drug buy-bust operation iti Barangay 50, Buttong ditoy ciudad ti Laoag.
Nabigbig ti subject ti operasyon a ni Mr. Ferdinand John Dagupion, agtawen ti 22, lineman iti PLDT Company ken residente iti Barangay Garreta iti ili ti Badoc.
Kinemmeg a dagus dagiti otoridad ni Dagupion kalpasan a naglako ti maysa a sachet a naglaon ti napagango a bulong ti marijuana nga agbalor ti sangaribo a pisos iti maysa a pulis a nagserbi kas poseur-buyer.
Malaksid iti maysa a sachet a maipagarop nga inlako ni Dagupion ket adda pay ti naala iti shoulder bag na nga agmaris ti berde a maysa a sachet a maipagarop a marijuana, maysa a ziplock a naglaon met laeng iti napagango a marijuana, maysa a kalibre 45 a paltog, maysa a bala ti paltog, dua ribo a pisos a personal a kwarta na ken ti cellphone.
Iti interview ti Bombo Radyo Laoag ken ni Dagupion, inbatad na nga alas-siete ti rabii a nalpas ti trabaho na ken nagmeryenda iti talipapa sakbay koma nga agawid ngem isu metten ti pannakatiliw na.
Inadmitir na idi damo nga agus-usar ti marijuana ngem saan nga inaldaw ken gatgatangen na daytoy iti online.
Nupay kasta, iti panagtultuloy ti interview ti Bombo Radyo Laoag kenkuana ket inbabawi na met laeng ti immuna nga inbaga na no sadinno nga inbaga na manen a saan nga agus-usar ken aglaklako ti illegal a droga.
Inpetteng na pay a saanna a bagi ti paltog a naala iti shoulder bag na.
Kabayatanna, basar iti PDEU ket karaman ni Dagupion iti druglist iti Provincial Level.
