LAOAG CITY – Inikkaten ti Philippine National Police ti gun permit ni Kingdom of Jesus Christ leader Pastor Apollo Quiboloy.
Daytoy ti inpakaammo ni Philippine National Police spokesperson PCol. Jean Fajardo kalpasan nga inaprobaran ni Philippine National Police chief Police General Rommel Marbil ti rekomendasion ti Firearms and Explosives Office nga ikkaten ti bileg ti License To Own and Possess Firearms ni Quiboloy.
Immunan nga inrekomendar ti Firearms and Explosives Office ti Philippine National Police ti panangala kadagiti paltog ni Quiboloy.
Dinakamatna ti Section 4 (g) ti Comprehensive Firearms and Ammunition Regulation Act gapu iti sangsangoen a kaso ti Pastor.
Kuna ni Fajardo, ipatungpalen ti Firearms and Explosives Office ti pammilin ken maikkan ti gundaway ni Quiboloy ti innem a bulan tapno isuko dagiti paltogna.
No saanna nga isuko ni Quiboloy dagiti paltogna ket maibilang a loose firearms.
Kabayatanna, basar iti rekord ti Firearms and Explosives Office, 19 a paltog ti nakarehistro ken ni Pastor Quiboloy no sadino maysa ti nag-expired ti lisensiana idi Marso ita a tawen.
