LAOAG CITY – Naisumitiren iti Municipal Social Welfare and Development (MSWD) ti listaan dagiti benepisyaryo ti social amelioration program manipod iti nagduduma a barangay iti li ti Dingras.
Daytoy ti kinumpirmaran a mismo a ni Mayor Jeofrey Saguid iti ili ti Dingras.
Inpakaammo ti mayor a ti listaan ket maipaskil kadagiti barangay hall.
Gapu iti daytoy, nagpanawagan ti mayor kadagiti residente a no adda ti makita da iti listaan nga adda ti mabalin na wenno babaknang ket ireport da laeng iti MSWD.
Innayon na a no adda met ti saan a naipan iti listaan a kwalipikado nga agbalin a benepisyaryo ti SAP ket nawaya dagiti residente a mangireport iti MSWD.
Immuna iti daytoy, inadmitir ti mayor nga idi damo ket napagsasaritaan da a mabalin a mairaman dagiti opisyal ti barangay a low-income kas benepisyaryo ti SAP.
Nupay kasta, gapu ta ado dagiti dumandanun kadakuada a sasao dagiti dadduma ket kinasarita na manen ti MSWD ken naamoan na a mismo payen a dagiti opisyal ti barangay ti nangpaikkat ti nagan da iti listaan.
Immapela ni Saguid nga ita a panawen ti krisis gapu iti covid-19 ket saan koma a pagriririan dagiti tulong nga aggapo iti gobierno a ti kangrunaan a maiprayoridad ket dagiti indigents. Low-income ken awan ti regular a pamastrekan na.
