LAOAG CITY – Kiniddaw ni Sang. Panlungsod Member Atty. Jason Perera iti City Engineering Office iti biang ni Engr. Marichel Batuac, dagiti listaan dagiti establishamento a saan a nag-setback wenno nangakupar iti kalsada.
Segun kenni Perera, kalikagomna a maamuan no ania dagiti addang nga inwayat ti city engineering office iti daytoy.
Ikagumaan ni Perera a maikkan ti aksyon daytoy gapu no adda latta dagitay mangakopar iti kalsada, ket pagamkanna nga agtultuloy latta a panangsalungasing da ti building code.
Kuna met ni Engr. Batuac, a nadutukan ni Engr. Joel Mateo kas representative ti opisinada para iti clearing operation, kasta pay nga adda dagiti reports manipod kadagiti Barangay Chairman ditoy ciudad.
Inlawlawagna a no naipatakder metten ti pasdek ket saan met a mangted ti engineering office ti occupancy permit, nga isu laeng ti makitkita da a wagas.
Imbatas ni Batuac a no adda ti road widening ken madalapos da dagiti pasdek, ket saanen nga obligado a bayadan ti gobierno dagiti madadael.
Kabayatanna, impakaammo na nga agingga inton bigat laeng ti pawayway dagiti saan pay a nag-setback.
