LAOAG CITY – Kinumpirmaran ni Department of Public Works and Highways (DPWH) Secretary Vince Dizon a naipatuloden iti Independent Commission for Infrastructure (ICI) ken iti Anti-Money Laundering Council (AMLC) ti listaan dagiti sanikua a kukua ti agasawa a kontraktor a da Pacifico “Curlee” ken Cezarah Rowena “Sarah” Discaya para iti posible a forfeiture wenno pannakaibabawi kadagitoy.
Segun kenni Dizon, naawaten ti ahensya ti listaan manipud iti Land Registration Authority (LRA) ken dagus a naisubmitir iti Independent Commission for Infrastructure ken Anti-Money Laundering Council.
Ti mapattapatta a P1 billion a balor dagiti sanikua ti Discaya ket naisyuan met ti freeze order ti Anti-Money Laundering Council, dua nga aldaw kalpasan ti panangipatulodda iti surat.
Nagkedked ni Dizon a mangidetalye kadagiti partikular a sanikua a na-freeze gapu iti data privacy issues, ngem kinumpirmaran na a karaman kadagitoy ti maysa a mansion nga isu ti nangipurwakan dagiti tattao ti pitak.
Inlawlawag ni Department of Public Works and Highways Undersecretary Ricardo Bernabe III a napateg a ma-freeze dagiti assets tapno saan a mailako wenno maiyakar kabayatan nga agtultuloy ti imbestigasion.
Inbatad na a no mapaneknekan a naggapo ti pondo iti iligal nga aktibidad ket mabalin a maipadalan iti forfeiture proceedings babaen ti Anti-Money Laundering Council.
