LAOAG CITY – Inpakammo ni Capt. Kerwin Collado, pannakangiawat ti Civil Military Operations Office iti 4th Marine Brigade nga agsagsaganan da para iti maiyuswat ti AFP Joint Exercise – DAGIT-PA wenno Dagat, Langit at Lupa.
Segun kenni Collado, maiyuswat daytoy iti Barangay Bubon, Burgos intono Nobyembre 9 manipud alas-otso ti bigat agingga iti alas-dose ti tengnga ti aldaw.
Kunana a nangrugi pay ti aktibidad idi Nobyembre 4 ken malpas intono Nobyembre 14 ngem intono Nobyembre 9 ti live fire exercises.
Inlawlawag a a siguradwen da met a saan a maapektaran dagiti mangalap iti nasao a lugar ken nabayagen ti naiget a pannakikoordenar da iti lokal a komunidad.
Inbatad na a daytoy nga aktibidad ket para iti Inter-operability ti Armed Forces of the Philippines ken tapno mapagtalinaed ti kapabilidad, response ken resiliency ti armada ti pagilyan.
Innayon na a karaman kadagiti mausar ket dagiti common rifles, 155 mm howitzer cannon ken dadduma pay.
