LAOAG CITY – Inreklamo ni Liza Dino-Esguerra, dati a chairperson ti Film Development Council of the Philippines (FDCP) a napukawan isuna ti nabalor a relo ken laptop manipud iti checked-in luggage-na idi simmangpet daytoy iti Ninoy Aquino International Airport (NAIA).
Segun ken ni Dino-Esguerra a partner ni Aiza ”Ice” Seguerra, saanna nga insigida a na-check ti nagian ti maletana apaman a nakasangpet iti pagtaenganda. Idi luktanna daytoy ket awanen ti dua a ramitna.
Inbatad met ni Ice Seguerra a nariparda nga adda ti iwa ti maleta nga arig nagusarda ti kutsilyo.
Inlawlawag ni Dino-Esguerra, inkabilna dagiti ramitna iti checked luggage gapu iti limitasion ti timbang iti carry-on.
Kuna ti eropuerto ken dagiti otoridad nga awan ti nakitada nga ebidensia a mangipaay ti nalawlawag iti napasamak.
Nupay kasta, basar iti eropuerto a bayadanda ti nabalor a relo ti karelasion ni Ice ngem saan a karaman ti laptop.
Inallukoy ni Dino-Esguerra dagiti otoridad nga agbalin a naridam iti panangresolbar iti insidente ti panagtatakaw iti Ninoy Aquino International Airport.
