LAOAG CITY – Naka-schedule ti Commission on Elections (comelec) ti Local Absentee Voting (LAV) para iti May 2025 election intono Abril 28 agingga iti Abril 30 ita a tawen.
Iti babaen ti Resolution No.11091, intuding ti Commission on Election ti Local Absentee Voting iti tallo nga aldaw ken silulukat daytoy kadagiti opisyal ti gobierno ken empleyado, miyembro ti Armed Forces of the Philippines (AFP) ken Philippine National Police (PNP), karaman dagiti kameng ti media.
Ti Local Absentee Voting ket maysa a sistema ti panagbotos a mangipalubos kadagiti kuwalipikado nga indibidwal, a nadutukan a mangannong kadagiti trabaho na iti kaaldawan ti eleksyon nga agbotos sakbay ti pannakailukat iti publiko.
Mapalubusan nga agbotos dagiti maseknan para kadagiti posisyon iti kina-senador ken party-list organization.
Para kadagiti opisyal ken empleyado ti gobyerno, ken dagiti miembro ti Armed Forces of the Philippines ken Philippine National Police, mabalin da ti agpila kadagiti aplikasyon da kadagiti mangidadaulo dagiti opisina/superbisor/komandante/opisyal a sumaruno iti ranggo.
Para met iti media, ti Local Absentee Voting applicatons da ket ipila da iti Office of the regional Election Director-National Capital region para kadagiti adda iti Metro Manila; Office of the City Election Officer para iti Independent cities iti ruwar ti Metro Manila ken Office of the Provincial Election Supervisor para iti lugar a saan a nadakamat.
Maipalagip nga adda ti pakabuklan a 84,358 a rehistrado a botante ti Local Absentee Voting iti panagbotos idi Mayo 2022.
