LAOAG CITY – Naipaayan ti pammigbig ti Department of Health – Ilocos Center for Health Development iti gobierno lokal ditoy ciudad ti Laoag ti Exemplary Public Health Achievement gapu ti pannakagun-od na ti 96.1% HPV Immunization coverage kas kaunaan a siudad a nakagun-od ti 90% immunization program target.
Daytoy ket iti babaen ti programa a Ligtas sa Cervical Cancer: Para sa Bawat Babae at Mag-Ina (PBBM-IN) a para kadagiti ubbing a babbai nga agtawen ti 9 agingga ti 14.
Mainaig iti daytoy, inbatad ni Dr. Rodrigo Catcatan, ti mangidadaulo ti City Health Office a daytoy ket mangipaneknek iti naan-anay a kooperasyon, dedikasion, ken naiget a koordinasion para iti pannakaprotehir ti salun-at dagiti ubbing.
