LAOAG CITY – Maipatungpal ti Localized Modified Enhanced Community Quarantine epektibo intono alas-dose ti aldaw iti ili ti Dingras.
Daytoy ket babaen ti Executive Order no. 123-21 a pinirmaan ni Gov. Matthew Marcos Manotoc kalpasan nga inrekomendar ni Mayor Joefrey Saguid iti nasao nga ili.
Naipalaon iti dukomento dagiti nagduduma a pagalagadan kas iti naiget a panangliklik kadagiti 3C’s wenno Closed spaces, Crowded places ken Close Contact.
Maipawil a rumwar dagiti agtawen ti 15 agpababa ken dagiti agtawen ti 65 agpangato.
Maipalubus met a rumwar dagiti addaan iti trabaho, maysa a miembro ti pamilya iti mabalin gumatang kadagiti kasapulan ken dagiti aktibidad a mabalin a maipalubos.
Maipatungpal pay ti curfew ken liqour ban manipud alas-nuebe iti rabii agingga iti alas-kuatro ti parbangon.
Saan met a karaman iti curfew dagiti health workers, hospital personnel iti pampubliko ken pribado a pasilidad, opisyal ti barangay kadagiti naapektaran a lugar, dadduma pay nga opisyal, kameng ti PNP, BFP ken dagiti agtrabtrabaho kas frontline COVID-19 service, ken dagiti APOR a kasapulan nga agtrabaho iti ruwar ti ili.
Iti biang ti transportasyon, maipalubos ti pampubliko a transportasyon iti uneg laeng ti ili karaman ti tricycle a masapul a maysa a pasahero, ken Jeep nga agakumudar iti 50% capacity.
Maiparit a rumwar dagiti maseknan malaksid iti pammalubos ti munisipyo nga agoperar ti PUJ tapno maibiyahe dagiti APOR nga agtrabtrabaho wenno agnegnegosyo iti ruwar ti ili.
Iti mainaig a damag, para kadagiti dumaldalyasat iti ili ti Dingras nga agturong kadagiti akin daydaya nga ili, maaramat ti Banna-Batac Road no agturong dagiti maseknan iti ili ti Marcos, Banna, ken Nueva Era.
Kadagiti agturong iti ili ti Solsona, masapol a maaramat ti Sarrat-Piddig route.
Maipalubos met para laeng iti transportasyon nga aggapu wenno agturong iti Sarrat, Piddig, Solsona, Marcos, Banna ken Nueva Era a kasapulan a dumalyasat iti ili ti Dingras.
Iti biang ti government offices, maaddaan ti skeletal workforce agraman iti alternatice work arrangement nga inaprobaran ti mangidadaulo iti maysa nga ahensya, malaksid iti ahensya a mangipapaay iti health ken emergency frontline service, boundary control ken dadduma pay a serbisyo.
Maipawil dagiti panagtitipon iti sporting event, ken dadduma nga entertainment activities, community assemblies, ken non-essential work gatherings idinto a maipalubos iti critical government service nga inaprobaran ti probinsya wenno munisipyo, humanitarian activities ngem masapul a masurot ti minimum health standards.
Iti religous gatherings, malimitaran ti 10 a porsiento a kapasidad ngem agdepende iti mayor no bilang nayunan na ti kapasidad ngem agpatingga laeng iti 30% capacity.
Kabayatanna, ti Section 11 a pakaseknan kadagiti APOR a rumwar ken sumrek iti ili, kasapulan a suruten da dagiti kondisyon a mandato dagiti APOR a residente iti Dingras ngem agtrabtrabaho iti ruwar ti ili, a mangala ti kopya ti work schedule manipud iti employer ken mangipaay ti kopya iti lokal a gobyerno ti Dingras ken kadagiti opisyal ti barangay.
Maipalubos a makastrek dagiti APOR a saan a residente iti Dingras nga addaan iti trabaho wenno transaksiyon iti uneg ti ili ngem masapul a mairekord babaen ti boundary control iti oras a panagserrek ti APOR, purpose ken iti oras iti panagruwar na iti ili.
Trabaho pay dagiti boundary control officer a mangeksamen iti kondisyon dagiti APOR, a no bilang makitaan ti sintomas iti COVID-19 ket mapawilan a makastrek iti ili ken mairepor iti MHO iti pagresidenyaan na nga ili idinto a dagiti APOR a residente iti Dingras ket mairefer da iti MHO ti nasao nga ili.
Naiget nga imonitor ti PNP agraman dagiti dadduma pay a law enforcement agencies dagiti amin a pagserrekan wenno apagruwaran iti ili ken maaddaan iti checkpoint ken boundary control tapno saan a makastrek dagiti tattao.
Karaman pay iti executive order no 123-21 ket mapatawan ti maiyannatop a pannusa ken multa dagiti agsalungasing kadagiti pagalagadan.
