LAOAG CITY – Maipatungpal ti Localized Modified Enhanced Community Quarantine ditoy siudad ti Laoag mangrugi intuno sabado, Hulyo 10.
Daytoy ket gapu iti agtultuloy a panagngato ti kaso ti covid-19.
Iti Executive Order No. 132-21 S. 2021 ni Gobernador Matthew Marcos Manotoc, nailanad nga apaman a maipatungpal ti Localized MECQ ket nasken a masurot ti panagisuot ti face mask, face shield ken ti dua a metro a social distancing.
Iti met garaw ti tattao, masapol a maysa laeng ti mapalubusan a rumuar nga aggatang ti kangrunaan a kasapulan iti pagtaengan.
Mainaig iti daytoy, mangipatungapl ti siudad ti schedule iti kada barangay pakairamanan ti nagduduma nga ili ken siudad ditoy probinsya a gumatang kadagiti essential goods ditoy siudad ti Laoag.
Naiget pay a maipatungpal ti liqour ban ken ti curfew manipod alas dyes ti rabii agingga iti alas kwatro ti parbangon malaksid kadagiti Helath Workers ken hospital personnel; government officials, kameng ti PNP ken BFP pakairamanan dagiti APOR.
Kabayatanna, nailanad iti EO a maysa laeng a pasahero ti aglugan iti tricycle, 50% ti kapasidad iti jeepney idinto a dua laeng ti masapol a pasahero iti taxi.
Mainaig iti daytoy, manipod intuno Hulyo 12 ket masapol nga agsardeng kadagiti border ti siudad dagiti public transaportation ken dita a maidissaag amin a pasahero nga agturong ditoy siudad.
Masapol met a dumalyasat iti by-pass road dagiti agturong iti sabali a lugar nu sadino a naiget nga I-monitor dagiti madesignaran a barangay officials ti exit ken entry points ti bypass road.
Kabayatanna, posible a masurot ti skeleton workforce iti local ken national government offices ditoy siudad ti Laoag kabayatan ti Localized MECQ.
Malimitaran iti 25 a tattao ti makipaset iti religious gatherings wenno saan a nasursurok ngem iti 30% a kasapasidad ti venue idinto nga agingga laeng iti siyam nga aldaw ti mansayag ti minatay ken iti laeng aldaw ti tabon a maipalubos ti musiko.
Mainaig iti daytoy, nailanad iti EO a dagiti APOR ditoy siudad ti Laoag nga agtrabtrabaho iti sabali nga ili ket masapol a maaddaan ti kopya ti schedule tapno mapalubusan a makaruar iti border control.
Manamnama a naiget a mamonitor ti entry ken exit points iti kada border tapno maliklikan ti panagserrek ken ruar ditoy siudad ti Laoag babaen kadagiti kameng ti PNP.
Naamoan a siasinnoman nga aglabsing ti pagalagadan kabayatan ti Localized MECQ ket mapatawan ti umiso a pannusa kas iti multa nga agingga 5,000 a pisos ken community service nga agingga iti 120 nga oras.
