LAOAG CITY – Naipatungpal ti localized modified general community quarantine iti ili ti Bacarra.
Daytoy ket kalpasan a naiparuk-at ti Executive Order No. 126-21 a pinirmaan ni Governor Matthew Marcos Manotoc.
Gapu iti daytoy, maipatungpal ti curfew a mangrugi iti alas-nuebe ti rabii agingga iti alas-kuatro ti parbangon.
Mapalubusan a makarwar kabayatan ti curfew dagiti health workers ken hospital personnel, opisyal ti barangay iti apektado a lugar ken key officers iti munisipyo, dagiti kameng ti PNP ken BFP ken dagiti APOR a kasapulan na ti agtrabaho.
Iti public transportation, maipalubos iti uneg ti ili ken masapul a maysa laeng ti pasahero iti tricycle ken 50% ti kapasidad ti Jeep.
Iti pampubliko a transportasyon a rumwar ken sumrek iti ili, ket masuspenso iti laksid no ipalubos ti ili para ti operasyon dagiti PUJ tapno maibiyahe dagiti APOR iti trabaho da wenno iti negosyo da ditoy probinsya.
Mainaig iti daytoy, maipalubos a malakasat dagiti lugan iti ili ti Bacarra ngem agmonitor dagiti opisyal ti ili iti national road idinto a barangay official ti agbantay kadagiti barangay roads.
Saan a maipalubos ti agidissaag manipud kadagiti lumasat a lugan kasta met a saan pay a maipalubos iti agilugan.
Iti mainaig a damag, agoperar dagiti opisina ti lokal a gobyerno ken gobyerno national babaen ti skeletal workforce wenno alternative work arrangements babaen ti panangaprobar ti mangidadaulo iti opisina ken adda ti pannakainaig na iti Civil Service rules malaksid iti sabali pay nga operational capacity ti kasapulan kas kadagiti ahensya a mangipapaay ti health and emergency frontline service, border wenno boundary control, ken dadduma pay a critical services.
Maiparit ti mass gatherings, ngem saan a limitado iti sporting event ken dadduma nga entertainment activities, community assemblies, ken non-essential gatherings.
Nalimitaran ti religous gathering iti ili ti Bacarra iti 10 a porsiento a venue capacity, malaksid no ingato ti mayor iti kapasidad agingga iti 30 a porsiento.
Maipalubus iti critical government service ken inpalubos daytoy ti munisipyo wenno ti probinsya ken ti otorisado a humanitarian activities ngem masapul a masurot ti minimum health standards.
Kabayatanna, iti garaw dagiti APOR a sumrek wenno rumwar iti ili ti Bacarra ket masapul a suruten dagiti sumaganad:
Mandato dagiti APOR a residente iti ili ngem agtrabtrabaho iti sabali nga LGU ket masapul nga addaan ti kopya ti work schedule manipud iti employer ken mangipaay ti kopya iti munisipyo wenno iti barangay.
Mapalubusan a makastrek dagiti APOR a saan a residente iti ili ti Bacarra ngem addaan ti trabaho wenno transakiyon iti ili.
Isurat met ti boundary control officer ti oras iti iseserrek na iti ili, ti gagem na iti uneg ti ili ken ti oras iti panagruwar ti maseknan ken masapul a kitaen pay ti opisyal ti kondisyon dagiti maseknan.
Mainaig iti daytoy, naiget nga imonitor dagiti kameng ti PNP babaen ti pannakikammayet da kadagiti law enforcement agencies dagiti sumrek ken rumwar iti ili.
Masapul a maaddaan ti checkpoint, ken boundary control ken mapawilan a makastrek dagiti tattao nga awan ti napateg a gagem na.
Maipalubus met ti panagehersisyo iti ruwar ti pagtaengan kas iti walking, jogging, wenno biking ngem masapul a suruten ti minimum health standards kas iti panagisuot ti facemask ken social distancing.
Mapatawan met ti maiyannatop a pannusa wenno multa dagiti agsalungasing babaen ti linteg ken ordinansa.
