LAOAG CITY – Inlawlawag ni Engr. Cynthia Iglesia iti Pagasa-DOST iti Laoag International Airport a nakapasar ti probinsya ti localized thunderstorm idi Martes wenno ti napigsa a panagtudo na binuyugan ti panagangin, panagkimat ken panaggurrod.
Kuna na a mangrugi ti pannakabukel kadagiti thunder clouds wenno cumulonimbus clouds kadagiti akin daya nga ili ditoy probinsya ken agpalaud a direksiyon a mapan iti baybay.
Maysa pay a rason ket gapu ti direksiyon ti angin a no sadinno ti malem ket aggapu iti daya ti angin ken agpalaud ti direksiyon daytoy.
Segun kenni Iglesia, daytoy ti rason a napasamak ti panagkimkimat na ditoy siudad ti Laoag idi Martes.
Inbatad na a ditoy a madlaw ti nalamiis nga pul-oy ti angin a maiyarngi iti signal numer 1 ti kapigsa na iti baet a bassit ti sakop laeng ti panagtudo.
Nagpalagip ni Engr. Iglesia, nga agtalinaed iti uneg ti pagtaengan kabayatan ti panagkimkimat, panagdalus ti pagayusan ti danum tapno maliklikan ti pannakalayus ken nasken nga ubraen dagitoy iti bigat imbes iti malem.
Innayon na a liklikan ti umasideg kadagiti poste, wenno panaglinong iti poon ti kayo no agkimkimat gapu ta dagitoy ti umuna matamaan.
Maipalagip a nakimat ti dua kadagiti taraken a baka ti pamilya Darang iti Brgy. Sta. Maria ditoy siudad ti Laoag ken ti pannakatukkol dagiti dadakkel a sanga ti poon ti Caimito iti Brgy. 21 iti ili ti Sarrat a nagtupak kadagiti sumagmamano a pagtaengan.
