LAOAG CITY – Naiyalud-od ti pannakaipatungpal ti lockdown iti pagtaengan dagiti nagpositibo iti covid-19 iti Barangay 11 ditoy ciudad ti Laoag.
Daytoy ket kalpasan nga adda dagiti lima a naimaldit a baro a kaso iti nasao a barangay a dagitoy ket da IN-C467 agtawen ti 62 a baket, IN-C468, agtawen 58 a lalaki, IN-C469, agtawen ti 22 a babai, APOR (customer service representative), IN-C470, agtawen ti 29 a babai ken IN-C471, agtawen ti 16 a babai.
Segun kenni Barangay Chairman Bernadine De Leon, agkakapamilya dagiti lima a kumpirmado a kaso no sadinno ket miembro met laeng iti pamilya ti ummunan a nagpositibo iti covid-19 a ni IN-C462.
Inlawlawag na a ti atapen a ti nakaalaan ti virus ti exposure dagiti lima kalpasan nga adda ti napan nagideliver iti pagtaengan da ngem saan pay a masinunuo no siaisinno ti nakaalaan ti virus ni IN-C462.
Nupay kasta, kuna ti kapitan nga apaman a dimmalan dagiti kapamilya ni IN-C462 iti swab test ket naiget ti panagbantay iti pagtaengan dagitoy tapno masigurado a saan nga agwaras ti virus iti barangay da.
Innayon na a natulnog met dagiti dimmalan iti swab test ken awan ti makita na a problema iti barangay da.
Nagpalagip ti kapitan kadagiti kabarangayan na nga agannad ken agtulnog kadagiti health protocols nangruna iti daytoy a panawen ti paskua.
