LAOAG CITY – Naiyalud-od ti lockdown iti Sitio 7 iti Brgy. 6 ditoy siudad ti Laoag kalpasan nga adda ti executive order ni Mayor Michael Marcos Keon.
Daytoy ket gapu ta maiyur-uray pay laeng ti resulta ti swab test dagiti kabbalay ni IN-C73, lalaki, agtawen ti 38, Customer Service Representative, symptomatic ken nakaadmit, basar iti nagbalin a karukar ni Gov. Matthew Marcos Manotoc idi Setyembre 9.
Kuna ni Barangay Kagawad Wilfred Santos, chairman ti committee on health nga adda ti walo a kabbalay a naipadalan iti swab test ken awanan pay ti resulta na.
Inbatad na nga isuda laeng a kabbalay ti pasyente ti nakapulapol na babaen iti inyuswat da a contact tracing.
Segun kenni Santos, agngudo ti lockdown intono bigat, Setyembre 18, 2020 iti alas-otso ti rabii.
Gapu iti daytoy, naiget paylaeng ti panagbantay dagiti opisyal ti barangay kadagiti pagserkan iti Sitio Siete iti nasao a barangay.
