LAOAG CITY – Naipatungpal ti lockdown kadagiti sumagmamano a pagtaengan iti 10 a Barangay iti ili ti Dingras gapu iti panagpositibo iti COVID-19 dagiti sumagmamano a residente.
Basar iti inparuk-at nga Executive Order No. 005 Series of 2022 ni Mayor Joefrey Saguid iti ili ti Dingras, karaman nga adda iti lockdown ket iti Brgy. Mandaloque, Peralta, Capasan, Medina, Madamba, Bungcag, Sagpatan, Puruganan, Cali ken Guerrero.
Gapu iti daytoy, nagpanawagan ti LGU Dingras nga amin dagiti maseknan a residente nga apektado a lugar ket makikooperar iti Rural Health Office para iti al-alisto a pannakaiyuswat ti contact tracing ken malappedan ti ad-adda pay a panagwaras ti makapatay a virus.
Basar iti EO, amin a naapektaran a pamilia ket mabarikadaan dagiti pagtaenganda tapno maipasigurado nga awan ti makaruar ken makastrek bayat a dumaldalan dagitoy iti panag-quarantine.
Naikkan met ti bileg dagiti Barangay Officials, uniformed personnel, health care workers ken government personnel a makastrek iti maseknan a pagtaengan para iti panangiyuswatda ti decontamination activities.
Agserbi met dagiti Barangay Officials kadagiti apektado a residente babaen iti pananggatang kadagiti kangrunaan a kasapulan dagiti na-lockdown a pamilia.
Kabayatanna, awan met pay ti naikabil iti Executive Order ni Mayor Saguid a petso ti panagngudo ti lockdown kadagiti apektado a pagtaengan kadagiti 10 a Barangay.
