LAOAG CITY – Naragsak nga inpakamo ni Mayor Remigio Medrano iti ili ti Sarrat a negatibo amin a resulta ti swab test dagiti 179 a primary contact da IN-C235, IN-C358, IN-C359, IN-C386.
Gapu iti daytoy, kuna ni Medrano a dagus na nga inrekomendar kenni Governor Matthew Marcos Manotoc ti pannakaikkat ti lockdown kadagiti uppat a barangay a residensya dagiti primary contacts.
Inbatad na a napatgan met daytoy babaen iti pammalubos dagiti miembro ti Task Force Salun-at ditoy probinsya.
Kabayatanna, kuna ni Medrano a nagtalinaed iti municipal isolation facility dagiti tallo a nagpositibo iti covid-19 para iti pannakaileppas ti 14-days quarantine dagitoy.
Maipalagip a naipan iti lockdown ti Brgy. 17, Bgry. 13, Brgy. 18 ken brgy. 16 iti nasao nga ili kalpasan a nakapulapol dagiti uppat a covid-19 positive dagiti sumagmano a residente.
Nu pay kasta, nagtalinaed pay laeng nga adda iti lockdown ti Sitio 4 iti Brgy. 14 nga isu ti ayan ti pagtaengan dagiti nagpositibo pakairamanan ni IN-C235 a pimmusay itay kallabes.
Mainaig iti daytoy, kiniddaw ni Medrano iti publiko nga agbalin a resposable ken agtulnog kadagiti naiyetnag a pagalagadan kontra iti covid-19.
