LAOAG CITY – Nangiparuk-at ni Mayor Michael Marcos Keon ti Executive Order a mangideklarar ti lockdown iti Brgy. 15 San Guillermo ditoy ciudad ti Laoag agingga Abril 26.
Daytoy ket kabayatan iti pannakaiyuray iti resulta ti test ti maysa a suspect COVID-19 patient iti nasao a barangay.
Basar iti Executive Order No. 18 Series of 2020, mapaserraan ken mabarikadaan amin nga entry ken exit points iti Brgy. 15 San Guillermo malaksid iti Rizal St., P. Gomez St., Bonifacio St., ken Gen. Luna St. ditoy ciudad.
Nakalanad iti EO a masapul nga adda iti maestablisar a checkpoint ken border control iti main entry ken exit point kadagiti boundary ti nasao a barangay agingga iti 11:59 ti rabii ti Abril 26.
Naiget a maipawil a rumuar dagiti residente iti nasao a barangay malaksid kadagiti health workers, kameng ti PNP, AFP, government workers, opisyal ti barangay ken media.
Nabalakadan dagiti residente nga agtalinaed laeng kadagiti pagtaengan da kabayatan iti pannakaipatungpal ti lockdown.
Mabalin a mapilaan ti kaso a panaglabsing ti RA 11332 iti siasinoman nga agsalungasing iti nasao a pammilin.
