LAOAG CITY – Kinumpirmaran ni Brgy. Chairwoman Elena Matias iti Brgy. Talugtog iti ili ti Solsona a dagus a naipatungpal ti lockdown ti Sitio 1 iti Brgy. Talugtog iti ili ti Solsona.
Daytoy ket kalpasan a nagpositibo iti covid-19 ti kabaranggayanna a ni IN-C675, agtawen ti 47, maysa a lalaki ken maibilang nga Authorized Persons Outside Residence wenno APOR nga agpapaay kas Cargo Driver ditoy Siudad ti Laoag.
Mainaig iti daytoy, kuna ni Matias a manamnama a dumalan ti swab test dagiti tallo a miembro ti pamilia ti nagpositibo.
Inbatad na a malaksid kadagiti kapamilya ti COVID-19 positive, karaman pay isuna a dumalan ti swab test pakairamanan ti maysa a Barangay Health Worker ken maysa a Barangay Tanod kalpasan a dagitoy ti nangala ti temperatura ni IN-C675 idi simmangpet iti pagtaenganna.
Inlawlawagna a naka-home quarantine ti pasyente sipod nagawid daytoy ken kalpasan a naamoan ti pasyente a primary contact daytoy iti kaubraanna a nagpositibo met laeng iti virus.
