LAOAGC CITY – Kanayun ti panangiyadal ti lokal a gobierno ditoy ciudad ti Laoag babaen ti City Environment and Natural Resources Office ti usto a pannakaimanihir dagiti basura.
Inbatad ni Mrs. Mylene Pascual, ti mangidaulo iti City Environment and Natural Resources Office, nga adda dagiti maibunbunong a composting kits kadagiti residente ken nagduduma nga ahensia babaen ti koordinadion iti opisina da ken ti Gender and Development (GAD) ditoy ciudad ti Laoag.
Kunana nga umaboten iti 1,367 ti inpaay ti city government a composting kits kadagiti urban barangays pakairamanan ti Metro La Paz, Department of Education, Day Care Centers ken Bureau of Jail Management and Penology.
Segun ken Pascual, babaen ti composting kits ket ditoy a maikabil dagiti biodegradable kas koma kadagiti nagimaritan ti nateng, prutas ken dadduma pay gapu ta mabalin a mapagbalin a ganagan dagitoy.
Mainaig iti daytoy, kuna na a target da a tunggal pagtaengan, pagadalan, ahensia ken pasdek ket maaddaan ti composting kits para iti programa a “nadalus ken naurnos nga aglawlaw”.
Innayon na a ti nasao a programa ket mangipakita iti agtultuloy a pannakaitandudo ti usto a waste segregation.
