LAOAG CITY – Tumulong ti lokal a gobierno ditoy siudad ti Laoag iti gobierno probinsial ti Ilocos Norte iti panagsagana kas panagbalin nga host iti mapaspasangasangan a Palarong Pambansa inton tawen 2025.
Segun ken ni Mayor Michael Marcos Keon, nakasaganada a makikammayet iti naindaklan nga aktibidad kas iti panagbinnulig ti Schools Division ti Laoag City ken Schools Division ti Ilocos Norte iti kaliplippas a Region 1 Athletic Association Meet.
Inbatadna a naimpapusoan nga ipaayda dagiti amin nga equipment iti lokal a gobierno kas panangipakita ti naiget a suportada iti probinsia.
Kunana a naragsak isuna a makitinnulong iti gobierno probinsial tapno agbalin a naballigi ti naisangsangayan nga aktibidad a maangay ditoy probinsia.
Maipalagip a nagbalin a naballigi ti pannakaisayangkat ti 2024 Region 1 Athletic Association Meet a nakipasetan dagiti 14 nga Schools Division iti intero a rehion uno.
