LAOAG CITY – Naideklaran kas drug free workplace iti lokal a gobierno iti siudad ti Batac.
Daytoy ket kalpasan a nagnegatibo amin dagiti empleado iti rimuar a resulta iti naisayangkat a drug test examination.
Segun ken ni Police Lieutenant Colonel Adrian Gayuchan, ti Hepe ti Philippine National Police iti siudad ti Batac, daytoy ket babaen ken ni Regional Director ti Philippine Drug Enforcement Agency a ni Mr. Joel Plaza nga inprisentar ni Atty. Jemima Dickson ti panangideklara kas drug free workplace iti lokal a gobierno iti nasao a siudad.
Inatendaran daytoy ni Ilocos Norte Police Provincial Office Provincial Director Julius Suriben pakairamanan ni Provincial Officer ti Philippine Drug Enforcement Agency Darnell Bacate ken ni Batac City Mayor Albert Chua.
Inbatad ni Gayuchan a kalpasan iti lokal a gobierno ket mangnamnama daytoy a sumarunonto metten a mapagbalin kas drug free barangay dagiti amin a Barangay iti intero a siudad ti Batac.
