LAOAG CITY – Naragsak ni Mr. Rumel Madamba, Municipal Administrator iti ili ti San Nicolas iti naiget a suporta dagiti tattao iti ummuna a Banni-it Festival, paset ti selebrasyon ti Damili Festival.
Segun kenni Madamba, daytoy ket iti laksid nga ababa ti panawen a panagsagana da para iti Banni-it Festival a naiyuswat iti Barangay 18, San Pedro iti nasao nga ili.
Inlawlawag na a saan laeng a dagiti residente iti ili ti San Nicolas ti nakipagragragsak no diket uray dagiti Fishing enthusiast manipud iti Dingras, ditoy ciudad ti Laoag ken Batac.
Kunana a maysa kadagiti nanggutigot kadakuada a mangiyuswat iti Banni-it Festival ket gapo iti suporta dagiti fishing enthusiast iti probinsya.
Malaksid iti daytoy, kunana a maysa ti Banni-it Festival kadagiti mangpasantak iti ekonomiya iti nasao nga ili.
Nagyaman met ni Madamba iti Municipal Agriculture Office ken iti Small Water Impounding Irrigators Association iti Barangay 18 ken dagiti suporta dagiti tattao nangruna ket 131 dagiti nagparehistro.
Kadua da iti pannakaipatungpal daytoy ti Municipal Disaster Risk Reduction and Management Office, Municiapl Health Office, Bureau of Fire Protection ken iti Philippine National Police.
Mainaig iti daytoy, kuna ni Ms. Cecilia Sambrano, ti Municipal Agriculturist a naipakammo met iti Bureau of Fisheries and Aquatic Resources ti Banni-it Festival ken amin a nausar ket non-toxic wenno natalged para kadagiti lames, dam wenno SWIP.
Karaman kadagiti nakipartisipar ket ti Samac SWIP, Catuguing SWIP, Bingao SWIP, Bugnay SWIP, ken San Pablo SWIP.
Kabayatanna, maysa met a menor de edad ti nangabak iti 1,500 a pisos para iti First Catch.
Umabot met iti 5000 a pisos iti 1st Prize, ti 2nd Prize ket 3500 a pisos ken ti 3rd Prize ket 2000 a pisos.
Innayon na nga agdepende met iti partisipantes no iyawid da ti maala da ken no ilako da ket adda met ti naikeddeng a presyo a 120 a pisos.
