LAOAG CITY – Kiddawen ti lokal a gobierno iti ili ti Solsona a mai-convert ti provincial road iti Brgy. Nalasin ken Brgy. Lipay kas national road.
Daytoy ti inbatad ni Mayor Joseph De Lara kalpasan a nagturong iti Central Office ti Department of Public Works and Highways (DPWH) tapno agpatulong mainaig iti kanayon a pannaka-isolate dagiti nadakamat a barangay nu adda ti bagyo a sumangbay.
Kunana a saan a makaipaay ti tulong ti national gapo ta daytoy ket maibilang kas provincial road.
Immuna iti daytoy, inpakaammo ti Mayor a kalpasan ti iduduprak ti bagyo Nando ket nagturong da Gobernador Ceclia Araneta Marcos ken Bise gobernador Matthew Marcos Manotoc iti nadakamat nga ili tapno kitaen ti situasion.
Inbatad na a basar iti Provincial Engineering Office, malpas ti rangtay iti uneg ti uppat a bulan, banag a narigat a magun-od gapu ta arigna karugrugi pay laeng.
Inlawlawag na a nasaysayaat no mapan da kitaen iti situasion ti upstream tapno saan a lumawlawa ti pagnaan ti danom, a mabalin nga ad-adu a pondo ti mausar nu matarimaan ti karayan ken iti rangtay.
Maipalagip nga iti kallabes ket naminsan manen a naisolate ti Baranay Lipay ken Barangay Nalasin gapu ta nawash-out ti karayan gapo iti napigsa a bagyo.
Immuna iti daytoy, adda pay iti inpan ti Provincial Engineering Office a 36 a lusob idi napalabas a panagbabagyo ngem arigna awan iti nagbanbanagan dagitoy.
