LAOAG CITY – Kalikagom ti lokal a gobierno ditoy ciudad ti Laoag a makaestablisar ti emergency substation iti laud, daya, amianan ken abagatan a paset ditoy ciudad.
Daytoy ti nagbalin a rakurak ni Mayor James Bryan Alcid kalpasan a balligi a nalukatan ti substation ti Bureau of Fire Protection iti Barangay San Mateo ditoy ciudad ti Laoag.
Segun kenni Alcid, daytoy ti kaunaan nga emergency substation a linukatan ti lokal a gobierno.
Kalpasan iti daytoy ket inbatad na a ti sumaruno nga addang nga aramiden da ket ti panakaideploy dagiti kameng ti Department of Public Safety tapno adda pay ti maideploy nga ambulansya malaksid laeng ti firetruck ti Bureau of Fire Protection.
Kunana a no adda ti sumangpet nga ambulansiya manipud iti national government ket isu ti panangikabilan da.
Malaksid iti daytoy, kunana plano pay ti city government a mangipatakder ti substation iti south of the river.
Mainaig iti daytoy ket nagkiddaw da met iti Department of the Interior and Local Government ti fire truck ken daytoy ket manamnama a maipaay iti sumaruno a tawen.
Innayon na pay nga ad-adalen ti lokal a gobierno ti panangipatakder ti emergency substation iti paset ti Barangay Lagui-Sail ken Barangay Salet Bulangon.
Kabayatanna, inbatad ti mayor a malaksid iti Bureau of Fire Protection ken Department of Public Safety ket addan to pay ti maideplot a kameng ti Philippine National Police tapno maipasigurado nga alisto ti panagresponde no adda dagiti emerhensiya.
