LAOAG CITY – Maysa nga agtawen ti 64 a lola idiay Tokyo, Japan ti naarestar kalpasan nga inadmitirna a dagiti luxury bags ken wallet nga ilaklakona iti bassit a shop-na ket peke ken dinaitna laeng babaen ti sewing machine iti pagtaenganda.
Basar iti saanen a nainaganan a suspek, linuktanna ti leather goods shop iti maysa a shopping street iti Katsushika Ward, sumagmamano a tawenen ti napalabas.
Rinugianna ti negosio nga aglaklako kadagiti bags ken wallet nga isu mismo ti nagdisenio ken nagdait.
Nupay kasta, idi timmaod ti COVID-19 pandemic idi 2020, kimmapsoten ti shop-na ken awanen ti gumatgatang kadagiti produktona.
Bayat a panpanunutenna no kasanona a biagen manen ti shop-na, adda ti nabuya ti baket iti TV no sadinno naammoanna a napigsa ti panaglako ti luxury bags ken wallets.
Kalpasan a nag-research online, naduktalan ti baket nga adda ti magatgatang a tela ti Louis Vuitton, Hermes ken Chanel iti internet ket nag-order ken dinaitna daytoy iti sewing machine-na.
Gapu ta pulido nga agaramid ti bag ti baket, ilaklakona dagiti peke a bag iti balor a 3,500 yen wenno katukad ti P1,300 agingga 8,000 yen wenno katukad ti P2,900.
Iti las-ud ti dua a tawen a panaglakona, naammoan a nakalako daytoy ti 900,000 yen wenno katukad ti P330,000.
Idi maarestar, inadmitir ti baket a peke dagiti bags ken wallet ken handmade nga isuna ti nagdait.
Napilaan daytoy ti kaso nga intellectual property infringement ken iyur-urayna ti maiyannatop a pannusa a maipataw kontra kenkuana.
