LAOAG CITY – Saan a maawat ni Mrs. Susan Acapuyan, residente iti Barangay Madanay iti ili ti Paoay ti ipupusay ti apoko na kalpasan ti pannakaipaagas na iti Mariano Marcos Memorial Hospital and Medical Center iti ciudad ti Batac.
Segun kenni Acapuyan, inpa-check up da iti nadakamat nga ospital ti luppo ti apoko na nga agtawen ti 10 ken naresetaan ti ibuprofen.
Nupay kasta, kalpasan a naipatumar ti ina ti ubing ti naireseta nga agas ket ado ti nagtubo iti bagbagi na ken saan a makaanges rason nga intaray da iti ospital.
Inpetteng na nga idi adda da emergency room ket naduktalan da a kritikal ti kondisyon ti ubing ken ti dinakamat ti staff ti ospital a rason ket ti agas a tinumar na.
Inlawlawag na a kalikagom na kuma a makasarita ti doktor a nangireseta ti agas ngem inbatad ti staff nga isu ti nagpirma iti death certificate ti ubing a saanen gapo ta nagsasarita dan.
Kunana a ti nailawlawag kenkuana ket agpayso a ti agas ti rason ti panag-allergy ti ubing ngem idi napukawen ti allergy ket ti covid ti timmama iti daytoy.
Mainaig iti daytoy, kunana nga iti ummuna a medical certificate ket awan met ti covid a nailanad ngem iti maikadua ket gapo metten iti nasao a virus. Dinakamat na nga uray makabulanen ti napalabas ket saan da a maawat ti napasamak nangruna ket saan met a nagsaksakit ken saan na a patien a covid ti rason ti nakatayan na.
