LAOAG CITY – Desido ni Mrs. Jasmin Caluya, lola ti napapatay babaen iti ama na a ni Christian Ancheta ngem agdama nga agnanaed idiay Stockton, California a mapatawan ti pannusa ti anakna a ni Richard Ancheta gapu iti pannagpalto-paltog na iti apoko na.
Kuna ni Caluya a nu makemmeg ti anakna ket saanna a lappedan ti maipila a kaso kontra iti daytoy.
Inpetteng na nga aniaman ti mapasamak ket saan na a kabaelan a mapakawan ti naaramid iti apoko na gapu ta nasingpet daytoy ken kaanuman ket saan a nagprobokar iti pamilyada.
Immuna iti daytoy, inlawlawag ni Caluya a sakbay a napasamak ti pammaltog ket nangibaga kenkuana ti anak na a ni Richard ti 20,000 a ribo a pisos tapno daytoy ti pagpuonanna nga agpautang.
Kuna na a gapu ta ti apoko na ti addaan ti urnong manipod iti ipatpatulod na a kwarta ket binaon na a mapan mangiruar ti 20,000.
Nu pay kasta, inbatad na nga intawag na lattan iti agnagan ti Mely Ragasa ken daytoy pay laeng ti nangited ti 20,000 ken ni Chris John nga isu met ti indeposito na iti bangko gapu ta saanna a kayat ti agiggem ti kwarta.
Inpakaammo na a nagdamag ti apoko na nu siasinno ti pangtedan na ti kwarta ngem saanna a naibaga a para iti ama na daytoy.
Dinakamat ni Caluya a simmaruno a timmawag ti anak na a ni Richard ket dita nga inpakaammo na nga indeposito ti apoko na ti kwarta.
Nu pay kasta, kuna ni Caluya nga inpa-withdraw na iti apoko na ti 10,000 a ribo a pisos kalpasan nga inbaga kenkuana ti anakna nga adda ti agisalda ti motor.
Inbatad na nga inyawat ni Chris John iti ama na ti 10,000 a ribo a pisos nu pay saan a nagtuloy ti nagisalda ti motorsiklo.
Kuna na a gapu iti napasamak ket inmandar na iti apoko na a maisubli pay laeng ti nabati a kwarta ken ni Mely a ngem saanna a naaramid a dagus gapu ta pinagbayad na ti tilapia iti piskarya.
Inpakaammo ni Caluya nga iti bigat sakbay a napasamak ti pammaltog ket nagturong ni Chris John iti piskarya kadua na dagiti dua nga annak ken live-in partner na.
Inbatad na a dita a nakita ti ama na ken dinamag na ti kwarta ket inpalawag ni Chris John a nakissayan na pay laeng ngem inyawat na ti nabati a walo a ribo a pisos.
Kuna ni Caluya a gapu iti pannakakissay ti kwarta ket arig nga isu metten ti nangkarkaryaran ti anakna a ni Richard iti apoko na agingga a napaltugan na daytoy.
Maipalagip a nagsagaba ti sugat iti nagduduma a paset ti bagi ni Chris John kalpasan a pinaltugan ti ama na iti namin ado a daras iti mismo nga uneg ti pagtaenganda.
Kabayatanna, inpakaammo ni Caluya nga ado ti bisyo ti anak na a ni Richard ken masansan a pagbusbusan na ti kwarta ket iti sugal nu sadino a maisalda na pay amin a sanikua da.
Agpapan ita ket saan met pay a masinunuo ti nagturungan ti nakalibas nga ama ken agtultuloy ti panagimbestigar dagiti otoridad ken ti pannakabirok daytoy.
