Maluksaw ni Mrs. Zenaida Miguel iti Barangay 49-A, Darayday ditoy ciudad ti Laoag iti nagbalin a kapadasan na iti Laoag City General Hospital (LCGH) kalpasan ti panangitaray na iti agtawen ti 10 nga apoko na nasangdo ti nuang.
Segun kenni Miguel, apaman a nakadanon da iti LCGH ket naipaayan ti first aid kit ti apoko na ngem kalpasan daytoy ket inbatad ti nangtaming iti ubing a maiyakar iti Gov. Roque Ablan Senior Memorial Hospital (GRASMAH) gapo ta maipagarop nga awan ti usaren da a pangdait iti sugat ti pasyente ken agas.
Gapo iti daytoy, kiniddaw ni Miguel a mausar ti ambulansya ti nasao nga ospital tapno napinpintas ti pannakaiyakar ti apoko na iti GRASMAH ngem maipagarop nga inbatad manen ti lalaki a nangtaming a masapol nga agbayad nga ummuna sakbay a mausar ti ambulansya.
Inlawlawag na a kalpasan daytoy ket inbabawi ni Miguel ti pannakausar ti ambulansya ti ospital ken nagarkila lattan ti tricycle tapno maiyakar ti apoko na.
Innayon na nga apaman a nakadanon da iti GRASMAH ket dagus a nataming ti apoko a sinangdo ti taraken da a nuang a nakasugatan ti kili-kili na.
