LAOAG CITY – Inrakurak ti naawagan kas “Long Jump Queen” ti Pilipinas ken heptathlon champion a ni Elma Muros-Posadas ti panangdayawna kadagiti agtutubo nga atleta a nakipaset iti Palarong Pambansa ita a tawen.
Inbatad ni Muros-Posadas, sumagmamano pay laeng nga aldaw ti Palaro ket adun nga insigida ti nakaburak kadagiti dati a rekord kangrunaanna iti tay-ak ti athletics.
Kunana a daytoy ket napintas a senyal ken daytoy ket pammaneknek ti dumakdakkel a bilang dagiti agtutubo a Pilipino a nainspiraran ken agkalkalikagum a padur-asen ti bagida babaen ti sports.
Malaksid iti daytoy, naragsakan ni Muros-Posadas ti agtultuloy a panag-develop kadagiti sports facility iti pagilian kas ti Ferdinand Edralin Marcos Stadium ditoy siudad ti Laoag.
Inlawlawagna a dakkel a tulong dagiti pasilidad iti panangasa ti laing dagiti atleta
Nangipaay pay isuna ti abiso kadagiti atleta nga agar-arapaap a makipaset iti nangatngato a tukad ti kompetision kas ti Olympics ken Southeast Asian (SEA) Games.
Kunana a kasapulan ti disiplina ken determinasion. Saan nga umdas a nalaing laeng ti maysa nga atleta, nasken a madanonn met ti required record tapno makapartisipar ti Olympics wenno SEA Games
Mamati ni Muros-Posadas a naruay nga ubbing nga atleta ita ti addaan ti potensyal nangruna ket adu ti ubbing ti nakipaset ti Palarong Pambansa a nakaburaken ti rekord.
