LAOAG CITY – Mapasaran ita nga aldaw, Hunyo 21 ti maibilang kas “longest day, shortest night” ditoy pagilyan.
Segun ken ni Sharmaine Bonilla, weather observer ti Philippine Atmospheric, Geophysical and Astronomical Services Administration (PAGASA), ti summer solstice wenno at-atiddog ti aldaw ngem rabii ket maminsan laeng a mapasaran iti uneg ti maysa a tawen.
Inbatad ni Bonilla nga ita nga aldaw ket umabot ti 13 nga oras ti kapaot ti aldaw gapu ta simmingising ti init iti oras ti alas-5:23 itay bigat ken lumnek to ti init iti ala-6:36 intono rabii.
Innayon na nga adda ti epekto na ti summer solstice iti pagilyan gapu ta no at-atiddog ti aldaw ket nangatngato met ti temperatura.
