LAOAG CITY – Mabayadanen dagiti lote a naala ti gobierno lokal ditoy ciudad ti Laoag para kadagiti proyekto kas kadagiti naaramid a kalsada, addan ti sumagmamano a tawen ti napalabas.
Daytoy ti maysa kadagiti iprayoridad ti City Government babaen iti liderato ni Mayor Michael Marcos-Keon.
Immuna iti daytoy, nakita ni Mayor Keon a nabayag unayen sipud naala dagiti lote ken nasken a maidalos amin dagitoyen babaen ti pannakainaigan da kas sanikua ti ciudad.
Mainaig iti daytoy, nagyaman ni Mayor Keon kadagiti pamilya a nakaalaan ti gobierno lokal ti lote kas iti pamilya Placida no sadinno a 10 a tawenen ti napalabas ngem agpapan ita ket saan pay a nabayadan ti nasurok a 1k square meter a naala iti lote da.
Ti nasao a lote ket karaman a napagbalin a kalsada iti dati a dumpsite iti Barangay Lagui Sail ditoy ciudad ti Laoag.
Malaksid iti daytoy, nabayadan metten ti lote ni Reynalda Salvador-Coleman iti Brgy. Vira kalpasan ti lima agingga iti 6 a tawen a daytoy ket napagbalin a kalsada iti bypass road.
Karaman pay ti naala a lote ti maysa a baket nga agtawen ti 88 ken taga Brgy. Barit ditoy ciudad, addan 10 a tawen ti napalabas.
