LAOAG CITY – Inbatad ti Department of Health (DOH) a maiprayoridad dagiti indibidwal a nababa ti mapaspastrek na iti inaldaw iti “zero-billing program” kadagiti ospital ti gobyerno.
Maipalagip nga iti maika-67 a kasangay idi Setyembre 13 ni Presidente Ferdinand Marcos Jr., binilin na ti ahensya nga ibaklay dagiti gastos iti amin nga inpatient, outpatient, ken serbisyo a pang-emergency iti 22 a pampubliko nga ospital iti intero a pagilian.
Naamoan nga umabot iti P300 a milyon a pisos ti nailatang para iti nasao a programa.
Kuna pay ni Domingo a gagem ti gobyerno a makissayan ti out-of-pocket a magastos iti salun-at, manipod P44 ti kada P100, ket maipababa iti P20-P30 apaman a madanun ti 2029.
