LAOAG CITY – Awan pay ti inparuk-at nga abiso ti Land Transportation and Franchising Regulatory Board (LTFRB) a saanen a mabalin nga agbiyahe wenno agpasada dagiti tradisyunal jeepney.
Daytoy ti inbatad ni Atty. Anabel Marzan-Nullar, ti Regional Director iti Land Transportation and Franchising Regulatory Board – Region 1.
Inlawlawag ni Marzan-Nullar a ti laeng inikkan da ti deadline ket ti Industry Consolidation.
Innayon na nga agingga nga awan ti pammilin da ket agtultuloy latta ti panagbiyahe ken panagpasada dagiti traditional jeepney aglalo no miyembro dagitoy iti consolidated group.
Iti agdama, inpakaammo ni Marzan-Nullar nga ar-aramiden da paylaeng ti Implementing Guidelines para iti fleet modernization.
