LAOAG CITY – Nagpalagip ti Land Transportation Franchising and Regulatory Board (LTFRB) kadagiti operator ken driver ti Transport Network Vehicle Services (TNVS) ken Public Utility Vehicles (PUVs) a masapol nga iyaplikar ti 20% a diskwento iti plete dagiti estudyante uray bakasyon ken holidays.
Segun ken ni Land Transportation Franchising and Regulatory Board chairperson Teofilo Guadiz III, entitled dagiti estudyante iti 20% discount iti amin a gundaway karaman ti holidays, weekends ken bakasyon, 24/7 iti intero a tawen.
Nagballaag pay ti Land Transportation Franchising and Regulatory Board chief kadagiti driver ken operator iti nadadagsen a pannusa a sangwen da no makaawat ti ahensya ti reklamo mainaig iti saan a panangipaay kadagiti estudyante ti nasao a diskwento nga imanmandar ti linteg.
Karaman kadagiti mabalin a sangwen a sanctions dagiti maseknan ket ti multa, suspensiyon ti prangkisa wenno naan-anay a pannakaawan bileg ti prangkisa para kadagiti mamin-adon nga aglabsing.
Kuna pay ti opisyal a masapol a maiyaplikar pay ti nasao a diskwento para kadagiti senior citizen ken Persons with Disability no sadinno a dagiti aglabsing ket sumango iti maiyannatop a pannusa.
Inaramid ni Guadiz ti nasao a ballaag kalpasan a nakaawat da ti reports a saan a panangsursurot ti sumagmamano a driver ti Public Utility Vehicle iti panangipaay ti diskwento.
