LAOAG CITY – Inbabawi ti Land Transportation Office (LTO) ti lisensya ti driver ti SUV a nangdarusdos kadagiti tattao iti entrance ti Ninoy Aquino International Airport – Terminal 1 idi Mayo 4, a nagresulta iti pannakatay ti dua nga indibidwal ken nakasugatan ti uppat a sabsabali pay.
Iti rakurak nga inparuk-at ti Land Transportation Office, inbatad ti ahensya a saanen a mabalin nga agmaneho ti driver iti uneg ti uppat a tawen.
Malaksid iti daytoy, napatawan pay ti multa a 2 a ribo a pisos ti driver para iti reckless driving kas naipalaon iti Law Enforcement and Traffic Adjudication System Fines and Penalties ti Land Transportation Office.
Sumangsango pay ti driver kadagiti kaso kriminal, karaman ti reckless imprudence resulting in double
homicide, multiple serious injuries, ken property damage.
Idi Mayo 16, nawaya-wayaan manipod iti pannakaibalud ti driver kalpasan a nagpiyansa ti P100,000, kas pammilin ti Pasay City Regional Trial Court.
