LAOAG CITY – Inlawlawag ti Land Transportation Office (LTO) nga awan ti total ban iti e-bikes ken e-trikes, ken mabalin da paylaeng nga agbiyahe kadagiti city ken municipal roads.
Segun ken ni Land Transportation Office chief Markus Lacanilao, ti maipawil laeng ket ti panagdalyasat dagitoy iti national highways ken kangrunaan a kalsada kas ti EDSA, C-5, Roxas Boulevard ken dadduma pay a major thoroughfares.
Inbatad ti Land Transportation Office nga ipatpatungpal ti restriksyon gapu iti road safety concerns, aglalo iti panagduduma ti kapartak ti e-bikes ken e-trikes no ikumpara iti dadduma a behikulo a mabalin a mangitunda ti aksidente.
Inpetteng pay ti ahensya a ti nasao nga addang ket preventive measure ken saan a pannusa.
Iti Metro Manila, maipatpatungpal ti nasao a pagannurutan, katulungan ti ahensya ti Metropolitan Manila Development Authority (MMDA), idinto a dagiti probinsya ket unaen paylaeng ti information campaign kabayatan ti panangurnus ti Transportation Department ti pinal a guidelines.
